Wala pa nakagwa ang resulta sang swab test sang duha ka mga persons under investigation (PUI’s) sa Negros Occidental nga ginpadala sa Research Institute for Tropical Medicine agud mahibaluan kun positibo ang mga ini sa 2019 novel coronavirus acute respiratory disease (NCOV-ARD).
Suno kay Provincial Health Officer Ernell Tumimbang, posible sini nga semana magagwa ang resulta bangud madamo karon ang ginapaidalom sa laboratory testing sa RITM.
Suno pa diri, ila karon ginakabig nga persons under monitoring (PUM’s) ang mga tawo nga naka-close contact sang Canadian national kag sang isa ka Pinay nga una na ginkumpirmar ni Governor Eugenio Jose Lacson nga mga PUI’s sa probinsiya.
Pananglitan nga magpositibo sa coronavirus ang duha, dapat nga magself-quarantine ang mga PUM’s kun wala man lang sang sintomas nga ginabatyag.
Paathag ni Tumimbang nga ang PUI’s amo ang mga tawo nga may yara sang travel history sa China ukon sa mga lugar nga may yara sang confirmed cases sang NCOV-ARD kag may yara sang sintomas sang nasambit nga balatian.
Apang kun may yara lamang sang travel history kag wala man lang sang ginapakita nga sintomas, makonsiderar lamang ini nga PUM’s.
Gin-athag man sini nga tubtob sa karon wala pa sang positibo nga kaso sang coronavirus sa probinsiya.
