US ELECTIONS UPDATE — Posible nga indi pa mahibaluan ang resulta sa US Presidental Elections sa Nobyembre 3.
Sa interview sang Bombo Radyo Bacolod kay Bombo International Correspondent Juram Gorriceta direkta sa Florida, USA, ginpahayag sini nga gintugutan sang US Supreme Court ang isa ka semana nga extension sang absentee ballot deadlines sa Pennsylvania kag North Carolina bangud sa coronavirus pandemic.
Suno kay Gorriceta, pwede pa nga batunon ang mga balota sa Pennsylvania tatlo ka adlaw matapos ang eleksyon bisan wala sang legible postmark samtang gintugutan naman ang pag-isip sang balota sa North Carolina siyam ka adlaw matapos ang eleksyon basta napostmarked ini sa election day.
Suno sa iya, dapat mahibaluan na kuntani sa Nobyembre 3 kun sin-o ang magadaog nga presidente sang Estados Unidos apang bangud sa kadamuon sang absentee ballots sa Pennsylvania kag North Carolina, madugayan sila antes maisip ang mga boto.
Bangud diri, ang resulta sa eleksyon ang unofficial lamang.
Sa pihak sini, nagalaom ang Pinoy nurse nga diutay nalang ang indi maisip sa Nobyembre 3 agud malab-ot ang threshold sa pagdeklarar sang winning president.
Si Gorriceta ang nagatrabaho sa isa ka ospital sa Florida kag ginapadayaw sini nga si US President Donald Trump ang iya ginboto.
