Posible nga maganubo sa P80/kilo ang retail price sang bombay sa mga merkado kadungan sang pag-abot sang mga imported onion nagikan sa China santo sa pagbanta sang Department of Agriculture.
Suno kay DA spokesperson Assistant Secretary Arnel De Mesa, possible nga mabatyagan na ang dalayon nga pagnubo sang presyo sang mga sibuyas sa sulod sang duha ka semana.
Gikan sa anay P180 tubtob P200 kada kilo nga sa karun nga presyo, possible nga maganubo na ini sa P80 tubtob P100 kada kilo nga sulod sa target price range.
Suno sa Bureau of Plant Industry (BPI), 459 metric tons nga pula nga sibuyas pa lamang gikan sa masobra 3000 MT nga gin-import ang nag-abot sa Pilipinas.
Sa puti nga sibuyas 200MT gikan sa masobra 1000 MT nga order ang nag-abot.
Suno kay De Mesa, amat-amat na nga nagasaka ang supply sang sibuyas sa mga mercado nagikan sa mga nag-abot nga imported, kaupod na ang mga dalagko nga bulto sang local supply kadungan sang tig-Alani.
Sa pihak sini, nagapabilin nga mahal ang presyo sang sibuyas sa mga mercado kun sa diin sa Metro Manila, nagahampang gikan sa P140 tubtob sa P240 ang kada kilo sang presyo sang pula nga sibuyas samtang P90 tubtob P150 naman ang kada kilo sang presyo sang puti nga sibuyas.
Una naman nga ginmando ni DA Sec. Francisco Tiu Laurel Jr ang pagpatigayon sang inspection sa mga cold storage facilities para matumod kun may mga nagatago sang stock sang sibuyas agud nga manipulahon ang presyo sa mga mercado.
