Ginalantaw sang nagabaligya sang kalamay sa syudad sang Bacolod nga mahimo nga mag-amat amat na sa pagnubo ang presyo sang kalamay sa tion nga mag-umpisa na ang milling sa bulan sang Oktubre bangud sa karun tuman na kataas ang presyo sang kalamay kag sa karun halos adlaw-adlaw na ini nga nagasaka.
Sa interview sang Bombo Radyo Bacolod kay Jimmy Soquiña, sang nakaligad nga inadlaw, ang refined sugar ang mahimo lamang mabakal sa P55 kada kilo apang sa karun P98 na ang kilo samtang sa iban nagadangat na sa masobra P100 ang kilo.
Ginalantaw man sini nga ang isa ka rason sa pagmahal sang presyo sang kalamayang pagmanipular sang mga traders bangud ang kalamay ang nastock na nga daan, gani makatingalahan nga nagtuman ka mahal.
Suno kay Soquiña, sa masobra 20 anyos sini nga pagbaligya sang kalamay subong lamang nagsaka sang tuman ang presyo sini kag adlaw adlaw pa ang pagsaka.
Ginalantaw man sini nga ginkalitan ang pagpasaka sang presyo sang kalamay bangud sa kataas sang presyo sang gatong.
Sa karun wala na ini nagaorder sang madamo bangud tama na kamahal ang presyo sang kalamay.
Wala man ini nagakomporme sa ginaduso nga P90 nga suggested retail price kada kilo sang kalamay bangud mapierde sila nga mga retailers.
Suno kay Soquiña, ang ila nga kapital ang P92 kada kilo gani indi mahimo nga ibaligya lamang nila ini sang P90 kada kilo bangud mapierde na sila.
Nagapati man ini nga apisar nga asod-asod ang pagsaka sang presyo sang kalamay, indi man ini magbili sang P110 kada kilo.
Suno sa retailer, nagakadapat man nga unahon ang mga traders nga hatagan sang SRP antes sila nga mga retailers bangud ang presyo sang ila ginabaligya nga kalamay ang nakadepende man sa presyo sang traders.
