Gin-appoint bilang associate justice sang Korte Suprema si Retired Comelec Commissioner Antonio Kho Jr. suno kay tribunal spokesman Brian Keith Hosaka.
Si Kho, kaupod sanday Commission on Elections (Comelec) chairman Sheriff Abas kag Commissioner Rowena Guanzon ang nagretiro sang Pebrero 2.
Suno kay Hosaka, nakabaton ang Korte Suprema paagi sa Office of Chief Justice Alexander Gesmundo sang appointment papers ni anay Comelec Commissioner Antonio Kho Jr. bilang Associate Justice sang Korte Suprema.
Sa isa ka separado nga statement, ginpahayag ni acting presidential spokesperson Karlo Nograles nga ginpermahan ni Presidente Rodrigo Duterte ang appointment papers ni Kho.
Suno kay Nograles, luyag nila nga mangin madinalag-on si Associate Justice Kho sa Korte Suprema kag kampante ang mga ini nga magapadayon ini sa paghatag sang hustisya sa kada lalaki, babaye kag mga kabataan nga may integridad, impartiality kag fairness.
Si Kho ang gin-appoint agud buslan si anay Associate Justice Rosmari Carandang nga nagretiro sang Enero matapos ang 27 ka tuig nga serbisyo sa judiciary.
Siya ang fraternity brother ni Duterte sa San Beda College of Law-based Lex Talionis Fraternitas.
Antes sang iya stint sa Comelec, si Kho ang undersecretary sa Department of Justice.
