Gintuad sang retired Philippine National Police (PNP) personnel nga gina-alegar tag-iya sang get-away vehicle sang nagluthang kay Philippine Drug Enforcement Agency (PDEA) agent Jason Yayola, nga kasunod sang pagpadulong sang PDEA agents sa ila lugar sang Oktobre 5 sang gab-i, ginsaskuhan man ang salakyan sini sang Oktobre 6.
Sa exclusive interview sang Bombo Radyo Bacolod kay retired P/Chief Master Sgt Jose “Joe” Besa, nakita sini sa footage sang CCTV sa lugar nga sang Oktobre 6, may mga van nga nagdulog sa ginparkingan sini sang itom nga Toyota Corola sa atubang sang Andres Bonifacio Elementary School 2 (ABES 2).
Santo sa footage, nagpanaog ang tatlo ka persona gikan sa van kag nakita sini nga ginbuno ang tatlo ka royda sang iya salakyan, kun sa diin ang royda nalang sa natuo nga bahin sa atubang ang wala nahalitan.
Ini ang nakita nalang ni Besa sang Oktobre 7 sang hapon gani nagkoordinar ini sa tag-iya sang CCTV agud matumod ang may kahimuan sa pagpanghalit.
Ginakasubo naman sini nga indi maathagan ang plate number sang puti nga van sa CCTV footage.
Gilayon naman nga ginpablotter sang retired PNP personnel ang insidente.
Paathag sini nga kun maathag kuntani ang plate number, pagafilan man sini gilayon sang kaso ang suspetsado.
Nagmensahe man ini kay PDEA Jason Yayola nga kuntani maluoy man ini sa kaugalingon ilabi na sa kapigaduhon sa karun.
Pahayag pa sini nga dapat maghalong sa ginahambal ang PDEA agent kaangay nalang sa pagtudlo sa iya salakyan apisar nga indi nya man ini kilala.
Dugang sini nga wala na kuntani gina-umid ang pamilya sini bangod nagahatag sang kahuy-anan sa iya, sa iya pamilya kagginulamid pa ang salakyan sa isyu nga wala man sila sang kahilabtanan.
