Ginkumpirmar sang Bureau of Immigration nga nakabalik na sa Pilipinas si retired police colonel Royina Garma, ang anay general manager sang Philippine Charity Sweepstakes Office (PCSO) nga ginapangita bangud sa iya gina-alegar may kaangtanan sa Duterte drug war kag sa kamatayon sang isa ka senior executive sang ahensya.
Nag-abot si Garma sa Ninoy Aquino International Airport (NAIA) nagikan sa Los Angeles, California, Sabado sang gab-i, santo sa post sang ahensya sa ila nga official Facebook page.
Ini matapos ang halos napulo ka bulan humalin sang gin-aresto ini sang otoridad sa California sa Estados Unidos sang Nobyembre 7 sang nagligad nga tuig bangud sang canceled visa.
Ginmandu-an sang Department of Justice (DOJ) sa Pilipinas ang BI nga i-facilitate ang pagbalik ni Garma sa pungsod.
Si Garma ang nagapangatubang sang reklamo nga murder kag frustrated murder bangud sa gina-alegar pagmandu sang pagpatay kay anay PCSO board secretary Wesley Barayuga sang 2020.
Sa isa ka inquiry sang House of Representatives, ginpahayag ni Garma nga ginsugo sia ni anay President Rodrigo Duterte nga magpangita sang opisyal nga magadala sang Davao model sang drug war sa bilog nga pungsod.
