Gin-athag ni Negros Occidental Provincial Disaster Management Program Division Head Dr. Zeaphard Gerhart Caelian nga missing pa ang retired police nga sakay sa pick-up nga naanod sa suba sa banwa sang Hinobaan sang Martes sang gab-i kadungan sang pagbaha.
Ginamaneho ni retired P/Chief Master Sgt. Dakie Dacuscos, 49 anyos, ang pick-up kag sakay sini ang asawa nga si Jessybel Dacuscos sang hinali nalang nga nag-awas ang suba nga ila ginalabayan sa Barangay Bulwangan, Hinobaan, Negros Occidental.
Suno kay Caelian, ginreport sa iya sang Hinobaan Disaster Risk Reduction Office (DRRMO) nga namissing ang mag-asawa sang Hunyo 1 bangod sa flashfloods gani gilayon naman nga nagpatuman sang bululigay nga search and rescue operations ang Provincial DRRMO, Philippine National Police (PNP), Negros Occidental Provincial Mobile Force Company (NOCPMFC), Philippine Maritime kag Philippine Coast Guard (PCG).
Nakita gilayon ang asawa sini, apang napilitan nga isuspende ang search and rescue operation sang Martes sang gab-i kag ginpadayun nalang kahapon.
Magluwas sa mag-asawa, sunod-sunod pa nga report sang nadula ang ila nga nabatun.
Kalakip na diri ang nareport nga missing alas-10:00 sang aga kahapon sa Barangay Asia, Hinobaan, nga gilayon man nga narescue kag narecover.
May duha man ka hubog nga nareport nga naanod matapos magtabok sa suba, kag madinalag-on man nga narescue nga buhi.
Magluwas sa mga ini may maglolo man nga namissing kahapon kun sa diin una nga nakita ang apo.
Samtang sa pagpakig-angot sa asawa sang retired police, gintudlo sini ang lugar kun sa diin nakita ang bana nga nagakabit sa kahoy, apang ang nasapwan sang mga rescuers amo ang namissing nga lolo.
Samtang narecover man nga buhi ang natrap sa Barangay Talipapa, Hinobaan.
Paathag ni Caelian nga ang retired PNP member nalang sa karun ang nabilin nga ginapangita sang mga search and rescue teams.
Nabudlayan naman ang mga ini sa pagpangita kahapon bangod sa dalagko nga balod sa dagat.
Nagdeploy man sang mga pump boats kag rubber boats ang PCG-Negros Occidental.
Nagalaom naman ni Caelian nga masapwan nga buhi ang retired police subong nga adlaw.
