Nagpanugyan sa mga kapulisan ang retired police kag instructor sa Regional Training Center may kaangtanan sa gun safety.
Ini ang kaangot sa nagluntad nga gina-alegar accidental firing nga gintunaan sang pagkamatay sang isa ka pulis kag isa ka sibilyan sa ciudad sang Victorias sang Disyembre 24.
Sa interview sang Bombo Radyo kay Retired Colonel Armando Tubongbanua, nagpanugyan ini sa mga kapulisan nga maghalong sa paggamit sang pusil agud malikawan ang mga aksidente.
Suno sa iya, santo sa cardinal principles sa pagkapot sang armas, kun magkapot sang pusil, indi ini dapat pag-ituon sa tawo ilabi na kun wala man sang plano nga gamiton ini pangtiro.
Gindugang man ni Tubongbanua nga indi maggamit sang armas kun yara sa impluwensya sang makahulubog nga ilimnon bangud kun hubog suno sa iya, dako ang posibilidad nga madulaan sang kontrol kag indi na makahibalo kun ano ang ginaubra.
Nagpang-abiso man ang retired police nga kinahanglan maghalong kun magduhol, magtinlo, kag magtago sang pusil.
Ginpaathag man sini nga nadala ang proper handling of firearms sa mga subject sang kurso nga criminology kag antes mag-take oath ang mga kapulisan, nahanas na ang mga ini sa husto nga paggamit sang armas.
