Nasapwan na ang bangkay ni retired P/Chief Master Sgt. Dakie Dacuscus nga namissing matapos nga maanod ini sa makusog nga daludo sang tubig gikan sa suba sa Barangay Bulwangan.
Suno kay Hinobaan Municipal Mayor Ernesto Estrao, nakita ang bangkay may kalayuon nga 8 nautical miles sa baybayon nga natung-an sang Barangay Asia kag Barangay Bulwangan takna alas-2:00 kaina sang hapon.
Dugang pa sini nga bangod halos guha na ka adlaw nga missing ang biktima, yara na sa state of decomposition ang lawas sang masapwan.
Paathag sini nga nabudlayan sa pagpangita ang mga rescuers bangod nagalugdang ang lawas kun malunod, apang nagalutaw naman kun maghabok na.
Gindala na ang bangkay sa purenarya sa ciudad sang Sipalay agud nga mahemos.
Suno kay Estrao, madamo sang mga nakigbahin kag nagvolunteer sa search and rescue operation kaupod na ang grupo sang mga mangingisda.
Madumduman nga si Dacuscus kag ang iya misis nga si Jessybel ang nagikan sa Bayawan City, Negros Oriental bangud nagbakal sang kinahanglanon sang ila ginikanan nga nagabalatian gani naghingagaw gid nga magpauli bisan mataas ang tubig sa dalan sa Barangay Bulwangan.
Pag-abot sa taytay sa suba, napatay ang makina sang Toyota Hi-Lux nga ginamaneho ni Dacuscus.
Bangud automatic ang transmission sang salakyan, indi naman mabukas ang pwertahan sini.
Gintinguhaan sang retired police nga gub-on ang pwertahan gani nakagwa ang mag-asawa.
Nag-uyatay ang duha apang naabtan sang dako nga daludo sang tubig gani naanod ang mga ini.
Maswerte naman nga nakauyat sa kawayan si Jessybel tubtub nga nasalbar ini sa dagat kahapon sang udto.
Pahayag ni Estrao nga nagtawag na ini sa Department of Public Works and Highways (DPWH), kag nagpahayag ang ahensya nga lantawon ang sitwasyon sang taytay.
