Nasamaran ang isa ka retired police bangud sa indi pag-inchindihanay matapos aksidente nga matiruhan sang isa man ka retired police sa Menlo Phase 1 Block 5, Menlo Village, Barangay Zone 10, Talisay City, Negros Occidental sang Miyerkules sang gab-i.
Ginkilala ang biktima nga si Abraham Perez, 56-anyos, balo, residente sang syudad sang Sagay. Samtang ginkilala naman ang suspek nga si Franklin Balbaguio, 50-anyos, may asawa, residente sang syudad sang Talisay.
Sa interview sang Bombo Radyo Bacolod kay Police Captain Rolly Ondoy, deputy chief of police sang Talisay City Police Station, nagagwa sa imbestigasyon nga gintambagan lang sang suspect ang biktima matapos nga nagbunot ini sang pusil kasunod sang pagbaisay sang live-in partner sini.
Nag-agaway sang armas luthang ang duha kagaksidente nga naglupok kun sa diin naigo sang bala si Perez sa iya nawala nga tiil.
Gilayon naman gindala si Perez sa Queen of Mercy Hospital Bacolod City agud mahatagan sang nagakaigo nga pagbulong samtang nakahunong karon sa kustodiya sang Talisay Police Station si Balbaguio kag ginahulat pa kun mapasaka sang kaso ang biktima batok diri.
