Patay ang isa ka retired teacher matapos nga masunog ang balay sini sa Purok Bato, Barangay Aguisan, cuidad sang Himamaylan, Negros Occidental, sang Nobyembre 10.
Ginkilala ang biktima kay Amelita Gemotea, retired teacher, senior citizen kag residente sang nasambit nga ciudad.
Sa interview sang Bombo Radyo Bacolod kay Police Lt. Col. Anthony Grande, hepe sang Himamaylan City Police Station, pasado alas 12:00 ang takna sang udto, nakabaton sila sang tawag nga nagapahibalo nga may yara sang nagluntad nga fire incident.
Suno kay Grande, gilayon man sila nga nagpadulong sa lugar kag nagpatigayon sang imbestigasyon.
Suno diri, ginpahayag sang umagad sang biktima nga nakita sini nga ang kalayo ang nagikan sa kwarto ni Amelita.
Ang balay ang duha ka panalgan kun sa diin nahamtang sa likod nga bahin ang kwarto sang biktima kun sa diin ini ang nagakatulog.
Ginpahayag man nga antes natulog ang biktima nagsindi ini sang kandila.
Nahibaluan nga kaadlawan mismo sang biktima sang nagluntad ang sunog.
Kaupod sang biktima sa balay ang iya umagad kag bata.
