Nagtililipon ang mga retirees sang Philippine National Bank diri sa Negros Occidental agud nga magrally bangod sa kulang, delay kag wala ginahatag nga mga benepisyo sang bangko sa ila nga mga nagretiro nga mga empleyado.
Kaina sang aga, nagpatigayon sang rally ang kapin 50 ka mga retired employees sang PNB sa kabug-usan nga Negros Occidental sa atubang sang PNB sa corner sang dalan Araneta kag dalan Luzuriaga, ciudad sang Bacolod.
Sa interview sang Bombo Radyo kay Eden Sombito spokesperson sang PNB retirees Negros Occidental, ila ginareklamo ang delay nga paghatag sang PNB sang Cost-of-Living Allowance kag Special Amelioration Allowance; illegal nga deduction sa Government Service Insurance System (GSIS) Gratuity Pay sa ila nga Seperation Pay; pagdula sang provident fund sang mga empleyado kag dapat nga pagbayad sang PNB sang GSIS retirement benefits kag pension sang mga retired employees nga nakabase sa kabug-usan nga tuig sang ila serbisyo sa gobyerno kag iban pa.
Suno kay Sombito, ang iban nga retirees nagtaliwan na kag ang iban ginamasakit na apang delay ang ila pagbaton sang benepisyo gikan sa bangko.
Ginkwestyon naman sang kaangay man nga spokesperson sang PNB kun paano nga ang dako nga bangko kaangay sini ang indi makahatag sang husto nga benepisyo sa iya empleyado.
Sa interview sang Bombo Radyo kay Ed Pama, asset sang bangko ang mga empelyado sini apang ila pa ginahold ang benepisyo nga dapat sa ila.
Nafile na sa supreme court ang kaso batok sa PNB kag ini ang dapat nga magbayad kag maghatag sang insakto nga batunon nga benepisyo sang empleyado apang tubtob sa karun, kulang kag delay sa gihapon.
Suno diri, indi lamang sa sila sa Negros Occidental ang nagareklamo sini apang sa kabilogan nga pungsod, ang mga retired employees sang PNB ang nagarally man batok diri.
Pahayag ni Pama, dapat nga ihatag sa ila ang para sa ila.
