Nagpanugyan si Bacolod City Action Team on Non-OFW Returning Residents (ATNORR) Chairperson – Councilor Cindy Rojas sa mga returning residents kag locally stranded individuals nga magsunod sa mga health protocols nga ginapatuman sa pagpauli sa ciudad agud wala sang risgo.
Ini matapos isa ka LSI ang nakapauli sa Bacolod City gamit lang ang rapid test result kag wala sang negatibo nga RT-PCR test result sang Pebrero 1.
Sa interview sang Bombo Radyo kay Rojas, ginpahayag sini nga pag-abot sang returning resident sa Bacolod Silay Airport, gincheck ang iya mga requuirements kag nakit-an nga kompleto ang iya mga dokumento apang wala ini sang negative RT-PCR test result kundi rapid antigen lang.
Suno kay Rojas, iya ini ginpasa sa group chat sang Emergency Operations Center kag ginpakumpirmar kun sarang ini nga mabatunan apang indi ini valid.
Gani ila ginpahibalo ang returning resident nga kinahanglan siya nga ipaidalum sa swab test kag iquarantine tubtob magwa ang resulta.
Indi pa ini kuntani magpasugot nga magpaswab apang pagkatapos sang pila ka oras, nagcomply naman ini kag nagcheck in sa hotel samtang ginahulat ang resulta.
Alas 10:30 sang gab-i sang nagwa ang resulta nga negatibo ini sa COVID kag alas 2:00 sang kaagahon, nagpamilit ini nga magpauli.
Suno sa konsehal, indi pa ini kuntani sarang nga marelease bangud kinahanglan pa siya nga i-endorso sa barangay apang pagka-alas sang aga sang Pebrero 2, nagpamilit siya nga magpauli kag wala na sila sang may nahimo.
Nagpadulong ini sa isa ka estasyon sang radyo kag ginreklamo ang travel guidelines sa Bacolod.
Suno kay Rojas, makabig nga unfair ang pagreklamo sini nga indi insakto ang requirements kag sistema sang ciudad bangud yara sa karun ang tanan sa tunga sang pandemic.
Pagkatapos ang eksplenasyon, nagpasugot kag nahangpan naman sang nasambit nga LSI ang mga guidelines kag naintindihan ang rason kun ngaa ginapatuman ini.
Suno sa konsehal, gindugang sang alkalde sa requirements ang negatibo nga RT-PCR results bangud sang nagligad nga tuig, nakit-an nga mataas ang positivity rate sang mga returning residents gani mas maayo kun masiguro nga negatibo sila sa virus antes magsakay sa eroplano.
Nagpanugyan ini nga maghalong kag indi pag-irisgo ang bilog nga ciudad para lang sa kaugalingon nga convenience.
