Nagdangat na sa kapin P430,000 ang revenues sa sulod lamang sang duha ka adlaw nga ginapatigayon nga 16th Negros Island Organic Farmers Festival sang probinsya sang Negros Occidental.
Sa interview sang Bombo Radyo kay Negros Occidental Governor Eugenio Jose ‘Bong’ Lacson, nagalaom ini nga magdamo pa gid ang mga consumers nga maghapit para magbakal sang mas barato kag healthy nga mga produkto.
Ang ika 16th Negros Island Organic Farmers Festival nag-umpisa sang Nobyembre 15 kag magadugay tubtob sa Nobyembre 19.
Suno kay Lacson, nagpartisipar man sa event ang probinsya sang Negros Oriental nga nagplastar kag nagbaligya sang ila produkto.
Dugang pa sini, ini nagapakita sang kaisahan sang duha ka probinsya sa pagduso sang organic farming.
Samtang, ginkasubo naman sang gobernador ang insidente sang kinawatay nga nagluntad kun sa diin nagkaladula ang mga gamit sang mga nagabaligya kag bangod sini ginpa-intensify ang security sa area.
