![](https://img.bomboradyo.com/bacolod/2019/09/Rice-tariffication-Presyo-sang-humay-nagsarurot.jpg)
Nagalaom ang mga mangunguma sa Negros Occidental nga mabuligan sila sang gobyerno kadungan sang nagasarurot nga presyo sang humay bilang epekto sang Rice Tariffication Law.
Sa interview sang Bombo Radyo kay Myrna Villa sang Barangay Taloc, Bago City, makaluluoy ang mga mangunguma bangud kontrolado sang millers ang presyohanay sang humay kag indi sila makareklamo.
Sa karon nagnubo ang presyo sang humay bangud ginapahayag sang millers nga madamo ang imported rice.
Ang presyohanay sang humay suno kay Villa ang nagadepende sa baridad sang humay bangud ang matig-a ang nagabili sang 13 pesos kada kilo samtang 17 pesos ang pinakamataas nga presyo sang mahumok nga baridad nga preska halin sa thresher ukon wala nabulad.
May mga lugar naman sa Bago City nga naghaplak ang humay sang naglabay ang bagyo tinalikdan nga bulan gani mas barato ang presyo sini kag nagadangat sa 10 pesos ang pinakamanubo.
Sa pihak sini suno kay Villa, wala man sang pagbag-o sa presyo sang bugas sa merkado.
Suno diri, 17 tubtub 20 pesos kuntani ang rasonable nga presyohanay sang humay.
Tinutuyo sang Rice Tariffication Law suno sa iya nga mapanubo ang presyo sang bugas apang wala man ini natuman.
Nagareklamo man ang mga manugbakal sang bugas bangud bisan nagbarato ang presyo sang humay, wala man nagbarato ang bugas sa merkado.
Sa interview sang Bombo Radyo kay Amy nga nagapanag-iya sang carinderia sa Bacolod, kuntani maganubo naman ang presyo sang bugas bangud nagbarato ang humay.
Suno diri, wala nagmahal ang bugas apang wala man sang pagbag-o sa presyo kun ipaanggid sa mga binulan nga mataas pa ang presyo sang humay.
Aminado naman ini nga makaluluoy ang mga mangunguma sa Rice Tariffication Law bangud indi gid ini makabulig sa ila kundi makahalit sa ila palangabuhian.