BACOLOD CITY – Nagapati si Ricky Serenio, ang bagman sang Berya Drug Group, nga pamahog sa iya ang pagpaluthang-patay sa iya nga manghod sa Barangay Singcang Airport kaina sang kaagahon.
Sa exclusive interview sang Bombo Radyo, ginpahayag ni Serenio nga isa ka pagbulabog kag pagyamuhat sa iya ang pagluthang-patay kay Wilmar Serenio alias Luklok, 31-anyos, nga ikatatlo sa apat sila nga mag-ulutod nga lalaki.
Nagapati si Serenio nga pamaagi ini sang mga iya mga nadalasa nga personalidad angot sa ilegal nga druga agud siya ang mahadlok apang wala siya nagakalingkang sini.
Suno kay Serenio, bisan ubuson pa sa pagpatay ang iya pamilya, indi siya mahadlok sa bisan kay sin-o man.
Gintawag naman ni Serenio nga mga matalaw ang mga tawo sa likod sang kamatayon sang iya manghod nga si alias Luklok.
Suno kay Serenio, kun matuod nga maisog ang mga suspetsado, kuntani siya ang ginpatay sang mga ini kag indi ang iya utod nga wala sang ikasarang nga magbato.
Ginpahayag sini nga wala man siya nagapanago kag sa pagkamatuod, naga-nightout pa ini sa mga ilimnan.
Samtang, isa ka paandam ang ginpalab-ot ni Ricky para sa mga personalidad nga yara sa likod sang pagluthang-patay sa iya manghod.
Ginpahayag ni Serenio nga kilala sini ang mga nagpapatay sa iya nga manghod kag ginpasiguro sini nga kun ano ang gin-utang sa iya, sobra pa ang pagasukton sini nga bayad.
Ginapanugyanan sini ang nagpatay kay alias Luklok nga magpreparar na nga madulaan man sila sang utod ukon bata.
Suno kay Ricky, nakahibalo ang iya mga kontra kun ano siya nga sahi sang tawo kag indi lamang ini basta nga bagman.
Liwat ginpahayag ni Serenio nga wala ini sang bisan sin-o man nga ginakahadlukan kag ang natabo sa iya nga manghod ang indi makalingkang sa iya.
