Nadakpan ang lalaki nga nagviral sadtong Setyembre 2023 matapos nga naggabot sang kutsilyo sang ini may naka gitgitan nga grupo sang mga cyclist sa ciudad sang Talisay kag sa karun ginpungkoy naman sini sang bato ang salakyan sang iya naka-argumento sa Burgos Extension, atubang sang East Lawn, Barangay Estefania, Bacolod City.
Madumduman nga sadtong Setyembre 29 2023, nagviral sa social media ang rider nga si Fidel Cachumbo, 47 anyos, Negosyante kag residente sang Purok Villa Felicidad, Barangay Estefania, Bacolod City, sang ini may nakagitgitan nga grupo sang mga cyclist sa Talisay City sang Setyembre 29, 2023.
Kahapon, liwat nga may naka-away ang rider kun sa diin ginpungkoy sini sang bato ang salakyan sang iya naka-away sa Burgos Extension, Barangay Estefania, Bacolod City.
Ang mga biktima ang ginkilala nga sanday Mark Gelario 36 anyos, Glass Installer, kag Gerson Bangkiling, 23 anyos, lunsay mga residente sang Purok Arao, Barangay Estefania.
Sa imbestigasyon sang Bacolod Police Station 4, naghana nga mag U-turn ang Izusu Islander nga ginamaneho ni Gelario apang hinali lamang sila nga ginkomprontar ni Cachumbo nga nagasakay sa isa ka motorsiklo.
Ginsumbag sang suspek si Bangkiling sa nawong kag ginpungkoyan sang bato si Gelario kag ginpahog nga patyon.
Sa karun yara na sa kustodiya sang Bacolod Police Station 4 si Cachumbo nga magapangatubang sang kaso nga Slight Physical Injuries, Malicious Mischief kag Threats.
