Napasakaan na sang kaso ang riding in tandem suspects nga nagluthang sa suldado nga katapo sang 79th Infantry Battalion sang Philippine Army sa Sitio Takas, Brgy. Palampas, San Carlos City, Negros Occidental, sang Lunes.
Ang biktima ang ginkilala nga si Alfort Tito, 40-anyos, residente sang Barangay Bato, Sagay samtang ang mga suspetsado ang ginkilala nga sanday Jobert Gimarangan Salazar, 31 anyos, kag Alfie Raganas, 42 anyos, lunsay mga residente sang banwa sang Calatrava.
Nag-agom sang tatlo ka igo si Tito, sa bahin sang hita, hawak, kag tiyan nga maayo lang nag-igo sa cellphone nga yara sa iya bulsa.
Nadakpan naman sanday Salazar kag Raganas paagi sa hot pursuit operation.
Nakumpiskar sa duha ang 45 calibre, apat ka magazine, 24 ka bala, holster, granada, KG9 gun, 15 ka sachet sang suspected shabu kag isa ka sachet sang marijuana nga nagabalor sang P1,106,527.
Sa interview sang Bombo Radyo Bacolod kay 1st Lt. Dan Carlo Samoza, civil military officer sang 79th Infantry Battalion, nakafile na sang kaso ang kapulisan sa duha ka suspetsado nga frustrated murder, possesion of illegal firearms, paglapas sa COMELEC gunban kag posession sang illegal nga druga.
Suno diri, nagaproseso man si Tito sa pagpasaka sang kaso batok sa mga suspetsado.
