Padayon ang pagpatigayon sang river clean-up sang Barangay Sincang-Airport sa ciudad sang Bacolod kada semana sa duha ka dako nga mga suba sa ciudad.
Sa interview sang Bombo Radyo Bacolod kay Punong Barangay Atty. Caesar Distrito, kalabanan sa mga ginhaboy nga basura ang nagatipon sa Lupit river nga amo ang naga-apekto sa mga kasubaan.
Suno diri, ang river clean up indi man totally nga solusyon para sa pagbaha apang isa ini ka tikang nga maamat-amat nga malimpyuhan ang suba.
Nagpanugyan man ini nga kuntani islan na ang pamatasan nga paghaboy sang mga basura sa bisan diin lang.
Samtang, sa bahin naman sang Magsungay river, may yara na sang ginbutang nga mga CCTV agud makita kun sin-o ang nagahaboy sang basura kasubong man nga ini makabulig sa pagmonitor sa status sang lebel sang tubig kag makapahagan-hagan sa pagluntad sang krimen.
Ang mga nadakpan ang ginahatagan sang warning apang kun ini ang liwat nila nga himuon, sila ang posible nga makasohan.
Pahayag ni Distrito, ang river clean up ang ginapatigayon kada weekend kaupod ang Bacolod Environment & Natural Resources Office (BENRO), mga fisherfolk, kag mga eco warriors kun sa diin 12 ka mga purok ang nagapartisipar.
