Na-install na ang anum tanan ka mga River Waste Trap sa anum ka creek sa ciudad sang Bacolod.
Nahibaluan nga una nga gin-install ang nasambit nga trap sa bahin sang Banago Creek sa Brgy Bata, malapit sa North Bus Terminal.
Ini ang gintambungan man mismo ni Bacolod City Mayor Greg Gasataya.
Sa interview kay Mayor Greg, ang advantage sang River Waste Trap installation sa Banago creek amo ang basura ang indi na magtabok sa Barangay Banago kag mas mahapos na ini nga limpyuhan.
Suno sa alkalde sa madason nga semana magabalik ang mini dredger sang ciudad agud nga palaparon ang creek santo sa request ni Barangay Bata Punong Barangay Remus Abaring.
Suno kay Gasataya padayon nga ginahimo sang ciudad ang pagpalapad kasubong man ang paglimpyo sa mga sapa sang ciudad.
Sa paglimpyo naman sa mga na trap nga basura magabuligay naman ang Barangay kag ang City Government.
Nagpasalig naman si Barangay Bata Punong Barangay Remus Abaring nga ang mini dump truck sang Barangay ang magakuha sang Basura nga matipon sa nasambit nga sapa.
Panawagan naman sang alkalde sa mga pumuluyo nga mangin disiplinado sa paghaboy sang basura.
Una na nga ginpahayag sang Environmental Specialist sang Bacolod Environment and Natural Resources Office (BENRO) nga ang River Waste Trap ang nagalutaw, kag mga nagalutaw nga basura lamang ang iya nga masikop, gani ini ang indi makabalabag sa pag-ilig sang tubig.
Ini ang may steel frame kag cage nga human sa mesh wire, samtang blue drum naman ang nagapalutaw diri.
Ini ang may 106 linear meters nga sakop, kag may 96 ka units.
