Naga-final preparation ukon final touch na lamang ang Rizal Elementary School antes ang pagpasakop sang ila mga estudyante sa Masskara Fesival Arena and Street Dance competition (school category).
Pito ka mga buluthuan ang magasambuwa sa kompetisyon nga lakipan sang Rizal Elementary School, Don Rodolfo A Medel Sr Elementary School, Andres Bonifacio Elementary School 2 (ABES 2), Asuncion L Lizares Elementary School, Estefania Elementary School, Education and Training Center 1 (ETCS 1) kag Paglaum Village Elementary School.
Sa interview sang Bombo Radyo Bacolod kay Ana Mae Uberas, Teacher’s League Pres Co Chairman for Masskara 2025 sang Rizal Elementary School, kapin 85 porsyento na sila nga preparado.
Ang mga ini ang nagapatigayon na lamang sang final touch ukon final preparation sa gamiton nga mga props kag headdress, apang ang mga kabataan ang preparado na.
Suno diri, 120 ang magapartisipar nga ginalakipan sang 60 ka dancers kag 60 nga gikan sa Grade 5 to 6.
Pahayag sini nga ang Rizal Elementary School ang nakapasakop naman sadto kun sa diin sang 2013 sila ang nag-1st runner up kag sang 2017 sila ang 2nd runners up naman.
Nagalaom ini nga sa pagbalik sang school category, makuha na nila ang kampeonato.
Aminado si Uberas nga indi malikawan nga may mga kabataan nga nagadugsing sa practice, apang nagapati ini nga sila ang mangin professional sa main performance.
Ginpasalamatan man sini ang suporta sang mga manunudlo, ginikanan, stakeholders, alumni, sponsors kag sang school principal nga si Pedro Crispe Jr.
Panawagan sini nga maglantaw kag suportahan bwas ang mga kabataan nga magaperform.
