BACOLOD CITY — Nadula ang tanan nga stress kag kakapoy nga nabatyagan sang mga manunudlo kag opisyal sang Romanito Maravilla Sr. National High School matapos nga nagkampeon sa Street Dance and Arena Competitions high school category sang MassKara Festival 2017.
Sa interview sang Bombo Radyo, ginpahayag sang principal nga si Cherish Flor nga daw ara siya sa langit sang nabatian ang announcement nga sila ang nagkampeon.
Tuman kanami sang iya pamatyagan bangud nadula ang kakapoy, problema kag stress nga ila ginadala-dala sang pila ka semana nga pag-practice tubtub sa final performance sang Oktubre 21.
Tuman man ang pasalamat sini bangud wala naglain ang ikaayong-lawas sang mga dancers bisan malawig ang ila practice kag wala man sang problema-pinansyal.
Suno sa in-charge sang practice nga si Lyra Dy, may yara sang 55 ka dancers ang RMNHS.
Antes sila ginpili, nagpatigayon sang audition sa mga estudyante nga interesado.
Sang napilian na, ginpatawag ang mga ginikanan sang mga kabataan agud nga maintindihan sang mga ini ang ginahimo sang mga dancers kag wala sang reklamo.
Tuman naman ang kalipay sini bangud luyag gid sang mga estudyante nga makuha nila ang kampeonato.
Tuman naman ang kalipay sang mga dancers sang Romanito Maravilla Sr. National High School matapos nga nagkampeon.
Sa interview sang Bombo Radyo, ginpahayag sang Grade 12 student nga si Rommel Regole nga naghandom gid man sila nga magkampeon sa paindis-indis apisar ini ang labing una nga kahigayunan sang pagpasakop sang RMNHS.
Si Regole ang nangin kabahin sang Barangay Villamonte sang tuig 2015 kag miyembro man sang Dagyaw Performing Arts sang RMNHS rason nga siya ang nag-audition agud nga mangin kabahin sang mga dancers.
Suno diri, gin-manage niya sang maayo ang iya oras bangud yara siya sa honor list kag kinahanglan pa nga magpractice pagkatapos sang klase.
Ang head dress sang RMNHS ang nagabug-at sang 1.5 kilos apang nagadangat ini sa duha ka kilo kun mabasa sang balhas.
Suno sa isa pa gid ka dancer nga si Herl John Martir, mas nanamian siya magsaot sang festival dance kun ipaanggid sa hiphop rason nga nag-audition ini nga mangin kabahin sang manugsaot sang ila eskwelahan.
Suno kay Martir, makaduha ka beses nila nga ginsuksok sa rehearsal ang maskara antes ang final performance sang Domingo.
