Nangin madinalag-on ang ginpatigayon nga road clearing operations sang Bacolod City Legal Enforcement Team kag Bacolod Transportation and Traffic Management Department (BTTMD) sa higad sang dalan sa bahin sang Barangay Villamonte, Bacolod City.
Sa interview sang Bombo Radyo Bacolod kay retired Police Col. Levy Pangue, focal person sang Bacolod City Legal Enforcement Team nagkooperar ang mga residente nga ginnlimpyuhan ang dalan sa Carlos Hilado Highway.
Suno kay Pangue, madamo sila sang nabaton nga request sang mga lugar nga nagakinahanglan sang clearing operation.
Suno diri, ginaamat-amat lamang nila ang pagpatigayon sini bangud kulang sila sa staff.
Ginpahayag man sini nga halos wala naman sang pahuway ang personnel sang Bacolod City Legal Enforcement Team apang nagpasalig ini nga magapadayon sila sa ila trabaho.
Kaupod man sang mga ini sa clearing operations ang katapo sang Department of Public Works and Highways (DPWH).
Antes pa man patigayunon sang Legal Enforcement Team ang clearing operations nagapadala ang Bacolod City Legal Office sang Notice to Vacate sa mga apektado nga residente.
