Natigayon na nga nakakas ang mga road obstructions sa Barangay 16, Bacolod City.
Madumduman sang tinalikdan nga Biyernes ginhatagan sang Notice to Vacate ang mga tag-iya sang mga kapehan kag balaligyaan nga nangin obstruction sa dalan nga maghalin na sa lugar sa sulod sang lima ka adlaw.
Ginpangguba ang mga illegal structures sa dalan padulong sa Sangguniang Kabataan (SK) Federation Center kahapon sang aga.
Ini ang ginpangbaklas agud nga magtawhay ang dalan bangud ang lugar ang tuman kagutok ilabi na nga may klase na.
Ginpangunahan sang Bacolod City Legal Office ang operasyon kaupod ang Office of the Building Official (OBO), Bacolod Traffic and Transportation Management Department (BTTMD), kag mga Barangay Officials.
Sa interview sang Bombo Radyo Bacolod kay Retired Police Colonel Levy Pangue, pinuno sang Bacolod City Legal Enforment Unit, anum palang ka structures nga ginlakipan sang bodega kag mga kapehan.
Suno kay Pangue, bilog nga ciudad ang patigayunan sang clearing operations apang ang gin-una lamang nila ang sa Barangay 16, Bacolod City bangud nagkaproblema sa trapiko kag ini man ang prayoridad ni Bacolod City Mayor Greg Gasataya nga mahatagan sang solusyon ang problema sa trapiko.
Samtang nabawi naman sang Bacolod City Government ang Sangguniang Kabataan (SK) Federation Center matapos nga ginhimo ini nga talyer.
Naghawan na ang nasambit nga building.
Sa interview sang Bombo Radyo Bacolod kay Atty Karol Joseph Chiu, Bacolod City Legal Officer, sa bulig sang City Engineers Office nabawi na ang propiedad kag natinluan na.
Suno kay Chiu, ginpreparar naman ang building agud nga masayluhan sang iban nga agencies nga nagaayo nga mahatagan sang opisina.
Pila sa mga nagarequest sang opisina amo ang Internal Affairs Service, PDEA kag PWD.
