Magapatigayon sang road show sang Automated Counting Machine nationwide sumugod Disyembre 2, 2024 tubtob Enero 30, 2025.
Sa interview sang Bombo Radyo Bacolod kay Negros Island Region – Commission on Elections Regional Director Atty. Lionel Marco Castillano, nagpanaog na ini sang mandato sa mga Municipal and City Election Officers kun sarang makapatigayon sang road show sang ACMs pagkatapos sang flag ceremony sa Lunes.
Sa initial direction gikan sa COMELEC National Office, ginapanugyan nga kadtuan ang tanan nga barangay, mga eskwelahan kag mga lugar nga masami ginatipunan kaangay sang malls kun sila ang sugot sa pagpatigayon sang road show sang ACM.
Ini ang halos kaangay man sa ginapatigayon nga offsite registration sa tion sang registration period.
Magluwas diri, luyag man sang COMELEC nga makapatigayon sang test run sa mga deputized agencies kaangay sang militar kag kapulisan kasubong man sa mga political parties kag Parish Pastoral Council for Responsible Voting (PPCRV) agud nga mafamiliarize nila ang paggamit sang machine.
Luyag man sang mga ini nga mapakita nga mas transparent ang Automated Counting Machines nga gamiton sa 2025 Midterm Elections.
