Atrasado ang widening project sang Department of Public Works and Highways sa Barangay 1 tubtob Barangay 2 sa Bacolod City bangod sa mga road obstructions partikular na ang mga pamalay.
Sa interview sang Bombo Radyo Bacolod kay District Engineer Leah Jamero sang DPWH – Bacolod, gin-athag sini nga ang ginareklamo nga buho sa tunga sang dalan sa Brgy 2 ang proyekto sang Bacolod City Engineer’s Office.
Ini ang plano nga tukuran sang traffic light.
Nagalaom si Jamero nga ini ang madasig nga matapos bangod delikado partikular na sa mga malagba kag dalagko nga mga salakyan nga nagalabay sa dalan.
Suno diri, kun matapos na kag maclear na ang area, amo pa lamang makapadayun sa pagtrabaho ang DPWH kag mapadayun ang road widening konekta sa Brgy 1.
Paathag ni Jamero nga ang pinakadako nga nagapa-atrasar sa road widening project amo ang road obstructions.
Ini bangod malawig pa nga negosasyon kag proseso antes mapahalin ang mga residente.
Ang mga ini ang ginabayaran, ang iban ang ginahatagan sang relocation kag nagakadugayan pa sa pagsaylo, samtang may iban nga ginahatagan na lamang sang cash assistance kun indi maqualify sa relocation.
Aminado si Jamero nga may iban nga pumuluyo nga buluntaryo nga naghalin sang sila ang nag-abiso, apang may iban nga wala pagid gihapon makabiya sa lugar bangod wala sang masayluhan.
Samtang ang iban ang nagakadugayan naman sa proseso sa pagsaylo sa panibag-o nga balay.
Paathag ni Jamero nga antes ang proyekto, may ginpatigayon na nga public consultation.
Suno diri, wala sila sang problema sa pagtrabaho, apang naga-untat untat ang construction bangod sa nasambitan nga mga problema.
