Ginpahayag sang election officer sa syudad sang Bacolod nga nakapatigayon na sila sang roadshow sang mga vote counting machines (VCMs) sa syudad sang Bacolod sang nakaligad nga semana apang ang national roadshow sang VCMs ang nagumpisa sang Biyernes kag matapos subong nga adlaw.
Sa interview sang Bombo Radyo Bacolod kay Atty. Revo Sorbito, sa tion nga magroad show sang VCM ini ang ginatest paagi sa pagshade, paggulo sang mock ballots sa VCM kag ginalantaw kun insakto ang pagisip kag pagbasa sini sang ginboto nga kandidato.
Gin-athag man ni Sorbito, nga ang mga pangalan nga nakasulat sa mock ballots ang mga indi matuod nga mga pangalan sang kandidato kag ang VCM nga gingamit ang indi man actual nga gamiton sa May 9 election.
Wala man sini ginadula ang posibilidad sang technical malfunction.
Ginaagda sang election officer sa syudad sang Bacolod ang mga pumuluyo ilabi na ang first time voters nga magpakigbahin sa roadshow subong nga adlaw sa SM City Bacolod agud nga makita sang mga ini kun paano magboto, maggulo sang mock ballots sa machine, makita ang pag-isip sang makina sang ila nga boto kag makita ang resibo sang ginboto agud masiguro nga husto ang pagbasa sang makina sang ginboto nga kandidato.
Ginpasalig man ni Sorbito nga ang COMELEC Bacolod ang nakahanda kag preparado na.
Suno diri may yara sang 450 ka mga VCMs ang pagagamiton sa syudad sa adlaw sang piniliay kag ini ang nadala na sa warehouse.
Samtang ang final testing kag sealing sang makina ang patigayunon sa Mayo 7 sa nagakalain-lain nga mga eskwelahan nga kabahin sang polling precints nga pagasaksihan sang katapo sang media kag iban pa.
