Gilayon nga ginpahalin ang anom ka mga officers sang Reserved Officers Training Corps sa Negros Occidental bangud sa gina-alegar kaangtanan sa insidente sang hazing.
Ini matapos magreklamo ang isa ka criminology student kag apat ka iban pa nga sila ang ginsakit sang ila upperclassmen.
Sa interview sang Bombo Radyo kay Army Captain Rodillo Famulag, pinuno sang 60th Community Defense Center sang Army Reserve Command, natabo ang gina-alegar maltreatment sa comfort room sang Bago City College tinalikdan nga semana.
Suno sa tagreklamo, ginsipa siya sang isa ka ROTC officer gani nabunggo ang iya ulo sa dingding kag may yara man ini sang lagob sa tiyan.
Suno kay Famulag, wala sang kaangtanan sa ROTC ang insidente kundi kabahin sang initiation ukon acceptance sa fraternity.
Ang mga suspetsado suno kay Famulag ang lunsay man nagakuha sang kurso nga BS Criminology.
Samtang nagapadayon ang imbestigasyon, ginkakas na ang mga ini bilang officers sang ROTC.
Suno kay Famulag, wala nila ginatolerar ang sala nga ginahimo sang mga ROTC officers gani patigayunon ang maid-id nga imbistigasyon kag kun sila ang mapamatud-an nga nagpanakit, magapangatubang ang mga ini sang kaso nga physical injury.
