Ginpaathag sang executive director sang Emergency Operation Center (EOC) sa syudad sang Bacolod nga ginpaidalum sa preventive maintenance ang mga RT-PCR machine sa Bacolod Queen of Mercy Hospital Molecular Laboratory gani temporaryo ini nga nagsirado kag indi bangod nga guba ang mga RT-PCR Machine.
Suno kay Bacolod City Administrator Em Ang, sya mismo ang nakig-angot sa administrator sang BQMH.
Ginpaathag sa iya nga indi out of order ang ila nga RT-PCR Machine kag sila ang nagsarado bangod nagapatigayon sang regular periodic preventive maintenance nga normal lang nga ginabuhat sa tanan nga molecular laboratories.
Dugang pa ni Ang nga ang mga technician ang magahalin pa sa Metro Manila kag ginahulat pa sang pribado nga ospital ang pag-abot sang mga ini.
Ginpasalig man sang mga ini kay Ang nga magabalik man gilayon ang ila operasyon.
Paathag man ni Ang nga ang mga molecular laboratory ang yara sa idalum sang close supervision sang Department of Health gani ginaseguro gid nga ang mga makina ang nagatrabaho sang maayo.
