Ginpahayag sang Russia nga pagabuhinan sini ang military activity sa Kyiv, nga capital sang Ukraine kag sa northern city sang Chernihiv, bilang senyales sang progreso sa isa ka peace deal.
Ini ang ginpahayag ni Deputy Defense Minister Alexander Fomin matapos ang paghinun-anon sa tunga sang mga delegations sa tunga sang duha ka pungsod sa Istanbul.
Suno kay Fomin, agud magsaka ang mutual trust kag makadihon sang nagakaigo nga mga kondisyon para sa mas dugang nga negosasyon kag paglab-ot sang ultimate goal nga pagperma sang agreement, naghimo sila sang radical nga desisyon nga buhinan ang military activity sa Kyiv kag Chernihiv.
Wala naman sini gintumod ang eastern kag southern parts sang Ukraine kun sa diin nagapatigagyon sang dalagko nga mga opensiba ang mga Russian forces.
Suno kay Vladimir Medinsky, chief negotiator sang Russia, ini ang isa sa mga tikang sa Moscow agud made-escalate ang 34-adlaw na nga konflikto.
Suno diri, magapasugot man ang Russia nga magpatigayon sang meeting sa tunga sanday Ukrainian President Volodymyr Zelenskyy kag Russian President Vladimir Putin kun igainitiate sang ila mga foreign ministers ang isa ka peace treaty.
