Sa una nga kahigayunan, gingamit sang Russia ang ila nga panibag-o nga Kinzhal hypersonic missiles sa Ukraine kahapon agud nga gub-on ang weapon storage site sang pungsod.
Nahibaluan nga sang nakaligad, ginapanginwala sang Russia ang paggamit sang high-precision weapon sa pagpakig-away, kag ang kahapon amo ang pinakauna nga kahigayunan nga gingamit ang Kinzhal hypersonic weapons sa gyera batok sa pro-Western Ukraine.
Suno sa Russian defense ministry, ang Khinzal aviation missile system nga may hypersonic aeroballistic missiles ang nagguba sa dako nga underground warehouse nga naga-unod sang mga missile kag aviation ammunition sa Deliatyn village sa Ivano-Frankivsk region.
Gintawag naman ni Russian President Vladimir Putin ang Kinzhal nga “Dagger” missile, nga isa ka maayo nga armas nga nagalupad sang 10 ka beses sangsa speed of sound kag makalusot sa air-defense system.
Ang Kinzhal missle ang isa sa mga panibag-o nga armas nga ginpakilala ni Putin sa iya nga state-of-the-nation address (SONA) sang 2018.
Ang Deliatyn village, ang masapwan sa idalum nga bahin sang Carpathian mountain, sa gwa sang Ivano-Frankivsk City.
Ang Ivano-Frankivsk ang may-ara sang 50 km nga border kaupod sang NATO member nga Romania.
