Nagpanawagan ang Russia sa Ukraine forces nga gilayon nga isungka ang ila mga armas kag nagpagwa sang bag-o nga ultimatum para sa mga nagadepensa sa ginsakop nga port city sang Mariupol nga indi na magbato.
Ang pagpamahog sang defense ministry sang Russia ang matapos gin-anunsyar ni Ukrainian President Volodymyr Zelenskyy ang pagsugod sang bag-o nga opensiba sang Moscow nga nakafocus sa nasidlangan sang anay Soviet state.
Suno sa statement sang Russian defense ministry, liwat sila nga nagapanawagan sa mga otoridad sang Kyiv nga mangin rasonable kag maghatag sang nagakaigo nga mando sa mga fighters nga untaton na ang ila resistance.
Apang suno diri, apisar nga indi sila makabaton sang mando nagikan sa mga otoridad sa Kyiv, nagapanwagan sila gihapon nga boluntaryo nga himuon sang Ukrainian forces ang ini nga desisyon kag isungka ang ila mga armas.
Wala naman sang direkta nga pagmensyunar sang bag-o nga opensiba sa eastern Ukraine.
Ginkumpirmar naman ni Russian Defense Minister Sergei Shoigu nga amat-amat nga gina-implementar sang iya forces ang ila plano nga magliberate kag nagahimo sang tikang agud mabalik ang malinong nga pagpangabuhi.
