Gindeklarar na sang Russian Army ang “unilateral ceasefire” sa Ukraine kahapon.
Suno sa Russian Defense Ministry, mangin epektibo ini sa tunga sang Mayo 8 kag 9 kadungan sang pag-obserbar sang World War II Victory Day.
Ini kasunod sang desisyon sang Supreme Commander-in-Chief sang Russian Armed Forces nga si Russian President Vladimir Putin.
Ang nasambit nga tikang ang para sa humanitarian considerations kag bilang pagdumdom sang Victory Day.
Sa pihak sini, nagapabilin nga yara sa defense position ang Russian forces kag nagpaandam sa Ukraine pananglitan maglapas sa ceasefire nga gintalana.
Sa kampo naman sang Ukraine, nagpahayag ini sang kaugalingon man nga ceasefire humalin Mayo 5 tubtob 6 apang ginakabig sini nga indi seryoso ang ginapropose nga “truce” sang Russia.
Ang Victory Day sa Russia sini nga tuig ang ika-81 nga anibersaryo sang kadalag-an sang Soviet Union batok sa Nazi Germany sang World War II.
