Nagpalupok sang rockets ang Russian forces kag ginpalibutan ang steel works sa Mariupol, Ukraine kun sa diin nagdulom ang kalangitan bangud sa aso sa ibabaw sang planta, nga ginahamtangan sang 200 ka mga sibilyan nga natrap sa sulod apisar sang nagapadayon nga evacuation.
Ang pagpang-atake ang kasunod sang ceasefire nga ginbroker sang United Nations sa Soviet-era steel complex nga nagpahanugot sa pila ka mga grupo sang sibilyan nga makahalin sa katapusan nga holdout sang Ukrainian fights sang nabagatnan nga port sang nagliligad nga mga inadlaw.
Suno kay Mayor Vadym Boychenko, madamo sa gihapon sang mga sibilyan ang natrap sa mga bunkers kag mga tunnels sa idalum sang complex kag kapin 100,000 ang nagapabilin sa nabilin nga bahin sang ciudad.
Ang Mariupol ang isa sa mga major target sang Russia bangud tinutuyo sini nga utdon ang Ukraine nagikan sa Black Sea kag ikonekta sa Russian-controlled territory sa south kag east.
Humalin sang Pebrero 24, pila ka mga ciudad ang naguba bangud sa pagpang-atake sang Russia, linibo ka mga sibilyan ang nagkalamatay kag kag masobra lima ka million ang naghalalin sa pungsod.
