Nagsuksok sang medical mask samtang nagahampang ang mga atleta sang Russian Olympic Committee kag Canada sa Beijing Winter Games matapos nadelay ang pag-abot sang resulta sang ila COVID-19 test.
Nakuha sang Canada ang kadalag-an sa score nga 6-1 apang antes sila makahampang, naghulat pa ang mga ini sang kapin isa ka oras bangud wala pa nakagwa ang COVID test result sang mga players sang Russia.
Suno kay Natalie Spooner, indi sila luyag nga ibutang sang ila mga coaches kag medical staff sa risgo.
Ang Olympics sa Beijing ang ginapatigayon sang “closed-loop” bubble kun sa diin dapat nga magsuksok sang facemask ang tanan magluwas lamang kun nagacompete.
Nagpaidalum sa RT-PCR test ang tanan nga yara sa bubble kahapon kag matapos ang pag-istoryahanay sa tunga sang duha ka team, nahisugtan nga suguran na lamang ang match nga nagasuksok sang face masks ang tanan nga humalampang.
Ginhukas naman sang mga Russian players ang ila masks sa third period matapos nagwa ang resulta nga negatibo sila sa virus.
Suno sa mga Russian players, wala sila sang may ginhimo nga malain kag nagpakuha ang mga ini sang COVID-19 test alas 8:00 sang aga, kaangay sang pagsulundan.
