Isa ka satellite images sang military base sa southeast sang Belarus capital Minsk ang nagapakita sang panibag-o nga mga pasilidad nga gintukod humalin sang tinalikdan nga mga inadlaw bilang madasig nga construction sang base para sa Wagner, ang Russian mercenary company nga yara sa likod sang wala nadayun nga mutiny.
Ginapahayag nga ang Wagner leader nga si Yevgeny Prigozhin ang nag-abot sa Belarus sang Martes kag siya ang ginpahanugutan nga magtukod sang panibag-o nga base sa isa ka vacant military facility malapit sa banwa sang Asipovichi, kapin 90 kilometros gikan sa Minsk.
Makita sa mga images nga ginpagwa sang Sentinel 2 satellites sang European Space Agency sang Hunyo 27 ang nagahilira nga mga malagba nga structures sa kaingod sang Tsel village, sa isa ka lugar nga wala pa sang may nahamtang nga bisan ano sang Hunyo 14.
Nahibaluan nga gin-imbetar ni Belarus President Alexander Lukashenko ang Wagner nga magset up sang operasyon sa ila nga pungsod bilang kabahin sa kasugtanan nga nagtapos sang mutiny sang Sabado.
Suno naman kay Russian President Vladimir Putin, hilway ang mga Wagner fighters nga magsaylo sa Belarus, mag-upod sa Russian military ukon magpauli sa ila mga panimalay kasunod sang mutiny, nga suno sa Presidente naghatag sang pagpanghangkat sa pagluntad sang civil war sa Russia.
