Gin-athag sang caretaker sang Nursery 1 Incorporated nga may 25 ka tuig nga lease contract ang iya amo nga Russian National sa nasambitan nga duta sa Barangay Minoyan, Murcia nga ila ginrenovate.
Ang development ang nag-angkon sang issue matapos nila ginpost ang litrato nga ginpintahan sang nanarisari nga kolor ang mga bato sa Asia river nga makabig paglapas sa environmental law.
Sa interview sang Bombo Radyo Bacolod kay Elvie Evangelio, ang propedad ang gin-arkilahan sang iya amo nga si Ivan Orlov, nga yara karun sa China, lima ka tuig na ang nakaligad gikan sa Mambukal Resort Development Corporation (MRDC).
Sila ang nagkoordinar sa personnel sang MRDC nga ginkilala lamang sini kay Naneth, nga nagpasalig nga may nagakaigo nga dokumento ang propedad kalakip na ang suba.
Bangod fully paid naman ang 25-years lease contract, sila ang nagpatigayon sang redevelopment sa area agud ini ang mangin matahom kag makabig nga mini-mambukal.
Sila ang nagtukod naman sang apat ka pool area kag mga structure sa palibot kag mismo nga river bed, nagtanom sang mga prutas kag iban pa nga mga kahoy tubtob nga napinsaran sang iya amo nga papintahan ang mga bato sa suba.
Gin-athag man sini nga manabaw ang tubig sang sila ang nagpaminta kag ang mga nagalabaw lamang ang ginpintahan.
Dugang pa sini nga indi man makabig nga resort ang propedad bangod ginabuksan lamang ini sa tanan kag wala man nagapanukot sang bayad ang iya amo.
Suno kay Evangelio, ang iya amo ang nagakoordinar man sa Barangay, kag nagapati ini nga nakabatun sang pahanugot antes ginpatigayon ang rennovation.
Napahibalo naman nila si Orlov tuhoy sa issue kag ini ang wala sang ihibalo nga ang tikang ang ginadumilian sa pungsod.
Nagpasalig man ang Russian National nga iya atubangon ang nahimo nga bayolasyon.
