Personal nga nagtawag kay Murcia Mayor Gerry Rojas ang Russian National nga nagarenta sang area kun sa diin ginpintahan ang mga bato sang nanarisari nga kolor sa suba sa Barangay Minoyan, Murcia.
Ini kasunod sang ginpatigayon nila nga inspection kahapon upod kay Negros Occidental Provincial Environment and Natural Resources Office (PENRO) Head Engr. Joan Nathaniel Gerangaya, Brgy Minoyan Punong Barangay Eric Espinosa kag mga Barangay Kagawad.
Ini kasunod sang paglapta sa social media sang mga litrato sang Asia River nga nangin madinu-agon matapos ginpapintahan sang Russian National nga si Ivan Orlov, sa tinutuyo nga mapatahom ang area.
Paathag sang alkalde nga ang lugar ang indi man tuman ka dako kag gin-improvise lamang sang tag-iya nga sa karun yara sa China.
Kahapon, nagcontact mismo sa iya si Orlov agud magpangayo pasaylo kag nagpaathag nga wala ini nakahibalo nga ginadumilian ang pag-alter sa natural beauty sang suba.
Nag-ayo man ini nga sila ang hatagan sang tatlo ka semana kag ila nga ibalik sa orihinal nga estado sang Asia River.
Ginbatun man ni Rojas ang pasaylo apang yara sa Barangay ang gahom sa pagpasaka sang kaso nga mahimo madagdag sa Anti-Vandalism Act kag Malicious Mischief.
Dugang pa sini nga kinahanglan man nga paluson ang mga structure nga gintukod sa mismo nga suba.
Ini bangod ang tanan nga suba ang wala nalakip sa commerce of man ukon indi mahimo mabaligya kag ini ang ginapanag-iyahan lamang sang gobyerno.
Aminado ini nga maayo kuntani ang intensyon sang Russian national ilabi na nga una na ini nagpananom sang mga prutas kag iban pa nga kahoy agud mapatahom ang lugar, apang nagkaproblema lamang sang ginpintahan ang mga bato sa Asia river.
Panawagan sang alkalde sa tanan nga banwa kag ciudad nga indi pagbag-uhon ang natural beauty sang suba bangod ini ang paglapas sa environmental law.
