RUSSIA – Gin-anunsyar sang flagship airline sang Russia nga Aeroflot nga iga-suspende ang tanan sini nga international flights humalin sa Marso 8, kadungan sa Western sanctions sa Moscow maykaangtanan sa invasion sa Ukraine.
Suno kay Russian President Vladimir Putin, nga kun sin-o man nga pungsod ang maytuyo nga magpatuman sang no-fly zone sa Ukraine ang igakonsiderar man sang Moscow nga naga-intra na sa conflict.
Ginpahayag naman sang Russian leader sa meeting kaupod sang mga empleyado sang Aeroflot nga ano man nga movement padulong sa ila nga dereksyon ang igakonsiderar nila nga pagpartisipar sa armed conflict.
Dugang pa sini nga ang pagpatuman sang no-fly zone ang makatuga sang dako kag malala nga konsekwensya indi lang sa Europe kundi lakip na sa bilog nga kalibutan.
Ginpanginwala man ni Putin ang mga nagalapta nga balita nga nagaplano ang Russia nga magdeklarar ang martial law sa ila pagpatigayon sang military incursion sa Ukriane sa ikaduha nga semana.
Suno kay Putin, ang Martial law ang ginapatuman lang sa mga tion nga may external aggression, kag wala pa ina nagaka-eksperyensyahan sang pungsod.
Sa pihak nga bahin, madamo naman sang mga news outlet ang nagpahayag nga temporaryo nga maga-untat sa ila nga trabaho sa sulod sang Russia, kadungan sang panibag-o nga layi nga mahimo makapapriso sa mga matukiban nga nagapalapta sang “fake”news.
Ginpahayag man sang Russia nga ila ginablock ang Facebook subong man ginalimitahan ang access sa Twitter, kadungan sa restrictions sa Russian media.
