Magapadayon sa pagbisita si Russian President Vladimir Putin sa Mongolia apisar nga ini nga pungsod ang miyembro sang International Criminal Court (ICC) nga amo anay ang nag-isyu sang warrant of arrest batok sa iya.
Natalana ang byahe sang Russian leader sa Septyembre 3.
Ini ang una nga biyahe sang Russian president sa isa ka member state sang ICC halin sang nagpagwa ang nasambit nga korte sa The Hague sang arrest warrant sang Marso 2023 base sa akusasyon nga responsable si Putin sa illegal deportation sang Ukrainian children padulong sa Russia kag sa Russian-controlled territory.
Ini nga pagbisita sa Mongolia ang kasunod mismo sa imbitasyon ni Mongolian President Ukhnaa Khurelsukh.
Nahibaluan nga sa idalom sang Rome Statute nga amo ang founding treaty sang ICC, ang mga pungsod nga miyembro sini ang mahimo maka-detain sa mga suspek nga nadagdagan sang korte sang arrest warrant kun magtapak ini sa ila teritoryo.
Kaangot diri, nagpanawagan naman ang Ukraine nga dakpon si Putin nga ila gintawag nga “war criminal.”
Madumduman nga ang arrest warrant nga gin-isyu sang ICC kay Putin ang una nga bes nga may ginapaaresto ini nga lider halin sa isa ka lima ka permanent members sang United Nations Security Council.
Wala naman nagakabalaka ang Kremlin sa natalana nga pagbisita ni Russina President Vladimir Putin sa Mongolia sa nasambit nga petsa.
