Gincongratulate ni Russian President Vladimir Putin si Philippine presidential frontrunner Ferdinand “Bongbong” Marcos Jr santo sa Russian foreign ministry.
Sa statement, ginpahayag sang Russian president nga “traditionally friendly” ang relasyon sa tunga sang duha ka pungsod kag nagpahayag man ini nga luyag nga ini ang magasanyog pa.
Sa sulat ni Putin, ginapangabay sini nga ang effort ni Marcos bilang pinuno sang pungsod ang magadevelop pa sa mabinungahon nga kooperasyon sa tunga sang Russia kag Pilipinas sa nagkalainlain nga aspeto.
Dugang pa ni Putin nga ini ang may kaangtanan sa interes sang parehas nga pungsod kag naga-ugyon sa tinutuyo nga mapabaskog pa ang security kag stability sa Asia-Pacific region.
Naglapit pa ang Russian-Philippine ties sa tion sang administrasyon ni outgoing President Rodrigo Duterte, nga naghikutar sang foreign policy padulong sa mas pag-abyanay sang Russia kag Pilipinas.
Ang mga lider sa iban pa nga Asia-Pacific countries nga tradisyunal na nga kaalyado sang Pilipinas ang nagpadala man sang ila nga pagtamyaw kay Marcos.
Nag-issue sang congratulatory letter si Japanese Prime Minister Kishida Fumio para kay Marocs sang Biyernes santo sa pahayag sang Japanese embassy sa Manila.
Santo sa sulat ni Kishida, determinado ini nga iduso pa ang padayun nga kooperasyon bilang “strategic partners” sa madamo nga mga aspeto agud nga marealisar ang “free and open Indo-Pacific”.
Nagpalab-ot man sang pagtamyaw kay vice-presidential frontrunner Sara Duterte si Japanese foreign minister Hayashi Yoshimasa, kag gindumdum ang people-to-people exchanges sang duha ka pungsod sa Davao City.
Nagtweet man si Australian premier Scott Morrison sang Biyernes sang iya nga pagtamyaw para kay Marcos, sa pagpahayag nga luyag sini nga ipadayun ang pag-abyanay sa tunga sang Australia kag Pilipinas nga sa karun nagdangat na sa 75 ka tuig.
