Ginkumpirmar sang media relations officer sang Vallacar Transit Incorporated nga wala pa sang mando nagikan sa Land Transportation Franchising and Regulatory Board (LTFRB) nga sarang naman makabiyahe ang mga provincial buses nagikan sa Negros Occidental padulong sa Metro Manila.
Madumduman nga sang nagligad nga Nobyembre 18, sarang na nga makabiyahe ang kabug-usan naga 221 ka mga bus nga may provincial routes padulong sa Kalibo kag Malay sa Aklan; San Jose, Antique; Roxas City, Capiz kag Estancia kag Miag-ao sa Iloilo.
Tanan nga mga bus routes ang magatapos sa Sta. Rosa Integrated Terminal sa Laguna.
Sa interview sang Bombo Radyo Bacolod kay Jade Seballos, ginpahayag sini nga apisar sang Nobyembre 18 pa pwede makabyahe ang mga proavincial buses, wala pa sila nakasugod bangud nga may mga requirements pa sila nga ginpang-comply.
Magluwas dira suno kay Seballos, naga-istoryahanay pa karon ang mga tiglawas sang kada provincial buses operators upod ang tagdumalahan sang Sta. Rosa Integrated Terminal bangud may yara ang mga ini sang kondisyon.
Suno sa media relations officer, tinguhaan nila nga makabiyahe na sila sa masunod nga semana ukon sa una nga semana sang Disyembre.
Ginkumpirmar man ni Seballos nga wala pa sang pagsaka sang pletehan sa mga provincial buses padulong sa Manila bangud kinahanglan pa ini nga aprubahan sang LTFRB.
Nagpahanumdom naman ini sa riding public nga dapat gid magsunod sa health protocols kaangay sang pagsuksok sang facemask kag face shield.
Kinahanglan man likawan sang mga pasahero ang paghambal kag pagkaon sa public utility vehicles.
