Ginahulat pa sang chairperson sang Committee on Energy and Public Utilities sa Sangguniang Panlungsod sang ciudad sang Bacolod ang sabat sang Central Negros Electric Cooperative (CENECO) sa asod-asod nga brown-out nga naeksperyensyahan sang mga konsumidor.
Sa interview sang Bombo Radyo kay Councilor Kalaw Puentevella, dako ang epekto indi lamang sang unscheduled brown out apang kasubong man sang mga scheduled brownout sa ekonomiya sang ciudad.
Suno diri, gina-abusar sang CENECO ang ila nga serbisyo nga wala na sa lugar nga mga pag-brown out ilabi na sa karun nga tuman ang init.
Pahayag ni Puentevella, hungod man ukon indi, sa karun maeksperyensyahan na gid ang kalain sang serbisyo sang CENECO.
Nagpanawagan ini sang insakto nga serbisyo bangod nga mahal ang sukot sa kuryente apang indi manami ang serbisyo.
Samtang, gin-extend ni Bacolod City Mayor Alfredo Albee Benitez ang suspension sang F2F classes subong nga adlaw tubtob bwas humalin sa Pre School tubtob sa Senior High School sa tanan nga public schools bangod sa ginalauman nga heat index nga magadangat sa 43 degrees.
