Ginkakas na si Safety and Security Division head Renelo Lastierre bilang presidente sang Progressive Alliance of Capitol Employees sang Negros Occidental.
Kaina sang aga, nagpatigayon ang executive board of directors sang PACE sang special meeting.
Ang special meeting ang gintambungan sang siyam nagikan sa 11 ka executive board of directors sang PACE apang wala nakatambong si Lastierre.
Diri nagmove si Director Joseph Ryan Cuadra nga ideklarar nga bakante ang tanan nga executive board positions nagikan sa chairman padulong sa sergeant at arms, santo sa by laws sang unyon, nga gin-ugyunan unanimously sang mga directors.
Ini ang ginsundan sang eleksyon sa mga miyembro agud makapili sang bag-o nga set sang officers kag napilian si Engr. Ruben Diamante bilang bag-o nga presidente.
Miyembro naman sang board of directors si Lastierre.
Suno kay Diamante, ginrespeto nila ang desisyon sang members of the board kag wala gin-impeach si Lastierre.
Suno diri, may individual reason ang pagboto sang mga miyembro sang board kag wala sila sang anuman nga akusasyon batok kay Lastierre, kundi nagtindog lang sa pihak sang mga empleyado sang Kapitolyo.
Ginpanginwala man sini nga impluwensiyado sila sang anuman nga personal nga away sang miyembro sang PACE kag sang opisyal sang Kapitolyo kundi conscience ini sang kada miyembro.
Sa personal nga rason ni Diamante, iya ginpanindugan nga importante ang co-existence sang provincial government kag sang unyon sang mga empleyado.
Una diri, may nagatuhaw nga may yara sang conflict sa tunga nanday Lastierre kag Provincial Administrator Atty. Rayfrando Diaz gani ginpareport kay Provincial Legal Officer Atty. Alberto Nillas ang tanan nga blue guards sang Kapitolyo samtang kay Lastierre naman nagareport ang mga watchmen.
