Nagpasalig ang bag-o nga hepe sang Sagay City Police Station nga himuon sini ang iya kutob masarangan agud mahatagan sang kalinong kag kahilwayan sa krimen ang ciudad sang Sagay.
Sa interview sang Bombo Radyo kay Police Major Albert Sy, ginpahayag sini nga iya nabaton ang mando tuhoy sa designation sini nga mangin hepe sang Hunyo 3 kag nag-assume sa pwesto sang Hunyo 4.
Suno kay Sy, gin-assign sa regional headquarters si Police Major Antonio Benitez apang wala nahibaluan ang rason sang nasambit nga tikang.
Suno sa bag-o nga hepe, padayunon sini ang mga programa nga naumpisan sang Sagay City Police Station ilabi na sa kampanya batok sa illegal nga druga, subong man sa pagpatuman sang mandatory nga pagsuksok sang facemask sang mga pumuluyo kag pag-obserbar sang social distancing.
Naghingyo man ini sang kooperasyon sa mga residente nga mag-uyon sa mga kapulisan agud mangin matawhay kag hilway ang ila nga ciudad.
