Ginkumpirmar sang bise alkalde sa ciudad sang Sagay nga nagtambong si Sagay City Treasurer Juvy Pinongan sa meeting nga ginpatawag sang Committee on Finance sang ila Sangguniang Panlungsod kahapon sang aga.
Sa interview sang Bombo Radyo kay Sagay City Vice Mayor Leo Rafael Cueva, ginpangunahan ang meeting a sang committee chairperson nga si Councilor Laura Javelosa.
Ginpakamaayo naman sang bise-alkalde nga nagtambong si Pinongan agud maghatag sang iya nga bahin sa tunga sang kontrobersiya sa kapin P7.3 million nga Health Emergency Allowance (HEA) nga wala ma-release.
Ang report sa resulta sang committee meeting ang igapasa sang komitiba sa regular session sang konseho sa madason nga semana.
Ginatudlo naman nga yara sa vault ang missing nga kabahin sang HEA apang indi ini mabuksan bangud indi na madumduman sang City Treasurer ang number combination.
Una na nga ginpahayag sang City Administrator sang Sagay City nga nagahulat sila sang rekomendasyon sang City Legal Office agud mabuksan ang vault.
Nagpabutyag naman ang Provincial Legal Office sang Negros Occidental nga handa sila maghatag sang legal assistance kun kinahanglanon sang ciudad sang Sagay.
