Ginaimbestigaran sang Department of Education ang nagtuhaw nga report nga “sagot-for-sale” ukon ang scheme kun sa diin nagabayad ang mga ginikanan sa isa ka persona agud nga magsabat sa learning module sang ila kabataan subong nga ginapatuman ang distance learning.
Suno kay Education Undersecretary Diosdado San Antonio, padayon subong ang imbestigasyon agud nga mavalidate ang report.
Panindugan ni San Antonio, indi dapat pag-itolerar ang nasambit nga scheme.
Ang amo nga scheme ang nagtuhaw kadungan sang hearing sang Senate committee on basic education sang Miyerkules.
Sa interview sang Bombo Radyo kay Gualberto Dajao, presidente sang Alliance of Concerned Teachers Negros Occidental Chapter, mahimo nga makasarang man ang ginikanan nga nagabayad sa manugsabat sang module kag indi man ini mahimo sang pigado.
Mahimo suno kay Dajao nga ginalagas sang ginikanan ang grado sang ila kabataan gani ginapasabtan sa iban ang modules.
Apang suno sa ACT president, dapat nga maislan ang nasambit nga tradisyon bangud ginaguba sini ang matuod nga katuyuan sang edukasyon nga pagtudlo sang attitude kag behavior nga madala sang kabataan sa pangabuhi.
Suno kay Dajao, dapat nga matapna ang amo nga tradisyon samtang temprano pa.
