Mangin retroactive ang saka sa kontribusyon sa Philippine Health Insurance Corporation nga ipatuman sa bulan sang Hunyo.
Sa interview sang Bombo Radyo kay Janimhe Jalbuna, head sang Public Affairs Unit sang PhilHealth Region 6, retroactive halin sa bulan sang Enero ang premium hike.
Buot silingon, magluwas sa increased contributions nga igabuhin sa salary sang empleyado sugod sa masunod nga bulan, ang mga miyembro ang magabayad man sang 1 percent additional premium para sa bulan sang Enero tubtub Mayo.
Sugod bulan sang Hunyo, 4 porsyento na sang monthly basic salary ang premium rate collection sang state insurer.
Bangud 3 porsyento lang sang basic salary ang ginbayaran nga premium sang Enero tubtub Mayo, kinahanglan nga bayaran ang 1 percent tubtub sa Disyembre 31 subong nga tuig agud nga wala ini sang interest.
Ang nagasweldo sang P10,000 panubo ang magabayad sang P400 kun sa diin P200 ang bayaran sang employee samtang P200 naman ang iya sang employer.
Bangud retroactive ang premium halin sang Enero tubtub Mayo, may dugang ini nga balayran nga P500 ukon P250 para sa empleyado kag P250 man para sa employer.
Ang nagasweldo naman sang dyes mil kag uno sentimo tubtub P79, 999.99 ang magabayad sang P400 tubtub P3,200.
Samtang P3,200 naman ang premium sang nagasweldo sang P80,000 pasaka.
