Ginpanindugan ni Senator-judge Alan Peter Cayetano ang importansya sang husto nga pagbutang sang label sa mga dokumento nga ginapresentar bilang ebidensya sa impeachment trial.
Suno kay Cayetano, mahimo nga maglibog ang ulo sang publiko kun lain ang nabutang nga title sang dokumento sa aktwal sini nga kaundan.
Partikular sini nga gintumod ang dokumento nga may tigulo nga “Summary of Vice President Sara Duterte’s Shareholdings,” nga suno diri naga-unod man sang mga datos nahanungod sa isa ka korporasyon.
Panindigan ni Cayetano, nga importante nga mangin mahalungon sa paglabel sang mga dokumento agud indi makatuga sang prejudice ukon sala nga interpretasyon batok sa depensa kag sa Bise Presidente, ilabi na nga ginapakita ang mga ini sa publiko paagi sa telebisyon kag iban pa nga platforms.
Gin-ugyunan man ni Presiding Officer Sen. Chiz Escudero nga mahimo patadlong ang nasambit nga isyu paagi sa pagbag-o sang title sang dokumento ukon pagseparar sang mga datos nga derekta nga nagatumod sa Bise Presidente.
